A artista lisboeta chegará o próximo 17 de outubro ao Auditorio Municipal Cine Alovi das Pontes para presentar en directo Liberdade, o seu último traballo discográfico, co que continúa consolidándose como unha das grandes figuras da nova xeración do fado.
Sara Correia afronta esta etapa da súa carreira co xusto status de fenómeno. Tras levar a súa música a escenarios de todo o mundo e recibir o aplauso de público e crítica, a cantante portuguesa construíu unha traxectoria marcada por unha personalidade artística inconfundible, unha enorme forza interpretativa e unha profunda conexión co fado.
Con dous álbums aclamados polo público, a crítica e a industria, e un nomeamento aos Latin Grammy, Sara Correia rodeouse ao longo da súa carreira dalgúns dos autores e compositores máis salientables da música portuguesa e internacional.

No centro de todo permanece sempre o fado, que a artista considera o seu fogar e desde o que desenvolveu unha linguaxe propia.
O seu último álbum, Liberdade, supón precisamente unha mirada profundamente privado cara a ese universo.

A propia Sara Correia defíneo como o seu disco «máis fadista», aínda que nel a linguaxe melódica e a esencia do fado ábrense a novas sonoridades, incorporando arranxos máis eclécticos e libres e afastándose de calquera estereotipo.
O resultado é un álbum cohesionado e cheo de matices, construído a partir de diferentes cores, texturas e influencias procedentes doutros xéneros musicais. Un traballo no que tradición e contemporaneidade conviven de xeito natural e no que Sara Correia volve demostrar que o fado pode evolucionar sen deixar de ser fiel á súa esencia.